【逃走他鄉・英國】英國租屋小錦囊 睇屋遲到隨時錯過筍盤
Reference: Apple Daily 在英國租樓的細節與香港不同，筆者作為過來人，整理了租樓錦囊給大家參考。 我們一家四口，冇人冇物，帶着四件行李，就到英國展開新生活。到埗之後先開始找地方租屋，經過兩個月「遊牧」，最後選擇在倫敦邊緣的Kingston落腳。在英國找租盤的程序，大致與香港一樣，可以上網如Rightmove、Zoopla或者直接到地產舖搵盤、約agent睇盤、傾掂數就簽約等，不過，當中的細節與香港不同，而其實極度重要！趁筆者還記得，整理了以下租屋小錦囊： 一、準時 很多時候英國地產agent會直接約你在樓盤門口等，他們十分準時，所以如果遇上塞車之類問題，要早一點與對方聯絡，千萬不要遲到！我們試過遲到10分鐘，agent就要改期，你便白走一趟，甚至錯失筍盤，所以大家記得要守時。 二、競價 如果對某樓盤有興趣，可以用電郵向agent出價，如果同時有另一位租客同你爭，agent就會問你最高可出價多少（the best offer we can make），我們的心得是「去到盡！」，我們試過慳住慳住「唧牙膏式」出價，結果有人出價更高，業主又接受，到時想再返價就太遲，真是「蘇州過後冇艇搭」。 三、Employment Reference Check 對於初來英國而又未有在當地戶口出糧紀錄的朋友，租屋要有心理準備，隨時要預繳6個月甚至12個月租。即使受僱香港公司有收入，他們亦要聯絡香港僱主，要求填一份Reference Check，證明你在該公司的職位、年薪多少等，更要僱主保證未來24個月會繼續僱用你，而且夫妻倆都要check。更麻煩的是，agent會預計僱主能於48小時內回覆，筆者試過因為僱主遲了回覆，心儀的樓盤就被別人租下，所以租樓前要跟香港僱主好好溝通一下。 四、佣金及按金 在英國，經由地產agent租樓，租客不用付佣金予經紀，但要付security deposit（按金），我們付了5個星期的租金作為security deposit，未知是否個個地方都一樣。Security deposit不是繳交給業主的，而是由一個叫Tenancy Deposit Scheme的第三方保管；當租約期滿，業主會檢查一下間屋有沒有問題，有的話就會於租約期滿前10日向Tenancy Deposit Scheme提出，於按金中扣除相關費用。另外，聽聞英國規定租客遷出時要徹底清
